Sefydliad Corfforedig Elusennol

Sefydlu’r cylch fel ‘Sefydliad Corfforedig Elusennol’

Mae Mudiad Meithrin yn argymell bod pob cylch yn sefydlu ei hunan fel Sefydliad Corfforedig Elusennol (sydd yn wahanol i sefydlu fel elusen arferol). Mae’r strwythur hwn yn rhoi mwy o ddiogelwch i ymddiriedolwyr ac aelodau Pwyllgorau, yn enwedig pe byddai’r cylch yn gorfod cau ac os byddai’r cylch yn fethdalwr.

Manteision dod yn SCE:

• Strwythur syml newydd a chrëwyd yn bwrpasol ar gyfer elusennau bach, fel Cylchoedd Meithrin.
• Bydd y Cylch Meithrin yn Sefydliad Corfforedig, sy’n golygu mai’r sefydliad sydd â chyfrifoldeb ac yn atebol am bob agwedd o’r Cylch Meithrin yn hytrach na’r pwyllgor fel unigolion. Mae hyn yn lleihau’r pwysau ar unigolion cyn belled bod y pwyllgor rheoli gwirfoddol yn cydymffurfio â gofynion cyfreithiol.
• Bydd y SCE yn bodoli fel endid cyfreithiol ynddo’i hun. Mae hyn yn golygu y gall trefnu cytundebau, dal eiddo a chyflogi staff yn enw’r sefydliad.
• Mae’r pwyllgor yn cael ei ddiogelu yn iawn.
• Gellir cofrestru’r Cylch Meithrin gydag AGC yn enw’r SCE yn hytrach nag fel unigolyn (Person Cofrestredig). Mae hyn yn diogelu’r Cylch Meithrin rhag gorfod dadgofrestru gydag AGC petai aelod o’r pwyllgor yn ymddiswyddo.
• Mae’r Cylch Meithrin yn atebol i’r Comisiwn Elusennau ynghyd ag AGC, sydd yn sicrhau atebolrwydd, cydymffurfiaeth ac arfer da (trwy ddarparu adroddiadau ariannol i’r Comisiwn Elusennau ayyb).
• Gall y strwythur cyfreithiol a’r mesurau diogelu ychwanegol annog mwy o unigolion i ymuno â’r pwyllgor rheoli.
• Bydd gan y Cylch Meithrin rif elusen, felly bydd yn gymwys i ymgeisio am grantiau mawr (sydd ar agor i elusennau cofrestredig yn unig).
• Y gallu i hawlio Rhodd Gymorth (Gift Aid)

Mae’r Mudiad yn cynnig gwasanaeth i sefydlu’r cylch o dan y drefn yma gyda’r Comisiwn Elusennol trwy ddewis lefel aelodaeth Yr Wyddfa. E-bostiwch post@meithrin.cymru am fwy o wybodaeth neu trafodwch gyda’ch Cydlynydd Cefnogi Cylchoedd.